G‘o‘za qator orasida zirasi yetishtirish bo‘yicha tajriba-sinov ishlari davom etmoqda
Farg‘ona tumanida Shinjon usulida g‘o‘za qator oralig‘iga hamkor ekin sifatida ekilgan Hindistondan keltirilgan ziraning rivojlanish holati ijobiy natijalarni ko‘rsatmoqda. Joriy yilda 5 gektar maydonda tajriba-sinov tariqasida tashkil etilgan ushbu ekin maydonida 2026-yil 30-may holatiga ko‘ra o‘simliklar 70–80 foiz gullash fazasiga kirgan bo‘lib, ularning vegetativ rivojlanishi yaxshi holatda kuzatilmoqda.
Mutaxassislar tomonidan maydonda agrotexnik tadbirlar belgilangan muddatlarda amalga oshirilmoqda. Xususan, zirani birinchi va ikkinchi oziqlantirish ishlari to‘liq bajarilgan bo‘lib, bu ekinning sog‘lom o‘sishi va yuqori hosildorligini ta’minlashga xizmat qilmoqda. Tajriba-sinov natijalari kelgusida g‘o‘za maydonlaridan samarali foydalanish hamda qo‘shimcha daromad manbalarini yaratish bo‘yicha muhim amaliy ahamiyat kasb etishi kutilmoqda.
